រដ្ឋបាលខេត្តពោធិ៍សាត់

Pursat Administration
ស្វែងរក

ឯកឧត្តម កែវ រតនៈ និងឯកឧត្តម ខូយ រីដា ជួបសំណេះសំណាលជាមួយសិស្សានុសិស្ស ថ្នាក់ទី១២ទូទាំងខេត្ត ជិត៣ពាន់នាក់ និងរៀបចំរាត្រីសមោសរ បាញ់កាំជ្រួច ដើម្បីអបអរសាទរពិធីបុណ្យចូលឆ្នាំថ្មី

  • 147
  • ដោយ Admin

(ពោធិ៍សាត់)៖ ឯកឧត្តម កែវ រតន: រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាល ចុះជួយស្រុកក្រគរ និងស្រុកកណ្តៀង និងឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ នាល្ងាចថ្ងៃទី០៦ ខែមេសា ឆ្នាំ២០២៣នេះ បានអញ្ជើញជួបសំណេះសំណាល ជាមួយសិស្សានុសិស្ស ថ្នាក់ទី១២ មកពីបណ្តាវិទ្យាល័យនានាទូទាំងខេត្ត ប្រមាណជិត៣ពាន់នាក់ ព្រមទាំងរៀបចំរាត្រីសមោសររាំលេង និងបាញ់កាំជ្រួចកំសាន្តសប្បាយ ដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំថោះ បញ្ចស័ក ពស.២៥៦៧ គស.២០២៣ ដែលនឹងខិតជិតមកដល់នាពេលដ៏ខ្លីខាងមុខ។

ពិធីនេះត្រូវបានធ្វើឡើង នៅបរិវេណពហុកីឡដ្ឋានខេត្តពោធិ៍សាត់ ដោយបានការចូលរួមពីថ្នាក់ដឹកនាំមន្ទីរអង្គភាពនានាជុំវិញខេត្ត កងកម្លាំងប្រដាប់អាវុធទាំងបី ព្រមទាំងអាជ្ញាធរក្រុងស្រុក ដែលមានការពាក់ព័ន្ធមួយចំនួនទៀត។

មានប្រសាសន៍នាឱកាសនោះ ឯកឧត្តម ខូយ រីដា និងឯកឧត្តម កែវ រតនៈ បានលើកឡើងស្រដៀងៗគ្នាថា យើងមានឱកាសជួបជុំគ្នានាពេលនេះ គឺដោយសារសម្តេចតេជោ ហ៊ុន សែន បានយកអាយុជីវិតទៅប្តូរ រហូតទទួលបានសន្តិភាព និងការអភិវឌ្ឍមកទល់សព្វថ្ងៃ ជាក់ស្តែងថ្ងៃនេះ គឺជាឱកាសដែលយើងបានជួបជុំ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំថោះ បញ្ចស័ក ពស.២៥៦៧ គស.២០២៣ ដែលនឹងខិតជិតមកដល់នាពេលឆាប់ៗខាងមុខ។ ជាការពិតណាស់ថា នៅចុងឆ្នាំ២០២៣ខាងមុខ កូនក្មួយទាំងអស់ នឹងចូលរួមការប្រឡងសញ្ញាបត្រមធ្យមសិក្សាទុតិយភូមិ ក្នុងនាមថ្នាក់ដឹកនាំ ឯកឧត្តមក៏សូមជូនពរដល់សិស្សានុសិស្សទាំងអស់ ឱ្យប្រឡងជាប់គ្រប់ៗគ្នា ដើម្បីឈានទៅសម្រេចបំណងប្រាថ្នា ទៅថ្ងៃអនាគត។

ឯកឧត្តម ខូយ រីដា និងឯកឧត្តម កែវ រតនៈ បានចែករំលែកនូវបទពិសោធន៍ផ្ទាល់ខ្លួន ដែលធ្លាប់បានជួបនូវបញ្ហាលំបាកនានា ក្នុងរបបខ្មែរក្រហម រហូតរួចផុតពីការកាប់សម្លាប់ អាចរស់រានមានជីវិត ទទួលបានសុខសន្តិភាព និងមានឱកាសសិក្សារៀនសូត្រ ឈានទៅសម្រេចគោលបំណង ក្លាយជាថ្នាក់ដឹកនាំមកដល់បច្ចុប្បន្ន។ ថ្នាក់ដឹកនាំទាំង២ ក៏បានកោតសរសើរដល់សាស្រ្តាចារ្យ លោកគ្រូ អ្នកគ្រូ ដែលបានយកចិត្តទុកដាក់ចិត្ត ខិតខំបង្ហាត់បង្រៀនដល់សិស្សានុសិស្ស មិនថាមានបញ្ហាទុក្ខលំបាកយ៉ាងណា ក៏មិនថ្អូញថ្អែរ ហើយតស៊ូពុះពារគ្រប់ឧបសគ្គ។

ថ្នាក់ដឹកនាំទាំង២ ក៏បានផ្តល់ដំបូន្មាន ដល់សិស្សានុសិស្សទាំងអស់ ឱ្យខិតខំប្រឹងប្រែងព្យាយាមរៀនសូត្រ សិក្សាស្រាវជ្រាវបំពេញបន្ថែម និងបង្កើននូវចំណេះដឹងភាសាបរទេស ដើម្បីអនាគតរបស់ខ្លួន ក្រុមគ្រួសារ និងសង្គមជាតិទាំងមូល ជាពិសេសចូលរួមដើម្បីធ្វើការអភិវឌ្ឍទឹកដីកំណើតរបស់យើង។ ជាការលើកទឹកចិត្ត ដល់កូនក្មួយសិស្សានុសិស្ស ថ្នាក់ដឹកនាំទាំង២ បានប្រកាសរៀបចំដំណើរទស្សនកិច្ច អញ្ជើញកូនក្មួយទៅលេងខេត្តសៀមរាប នាពេលឆាប់ៗខាងមុខ ហើយបន្ទុកទាំងអស់នោះ ក្រុមការងារជាអ្នកទទួលរ៉ាប់រង។ 

ឆ្លៀតក្នុងឱកាសនោះ ឯកឧត្តម ខូយ រីដា និងឯកឧត្តម កែវ រតនៈ  ក៏បានរៀបចំរាត្រីសមោសររាំលេង និងបាញ់កាំជ្រួចកំសាន្តសប្បាយ ដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ នាពេលឆាប់ៗខាងមុខផងដែរ៕

Ti Amo (ពស)

អត្ថបទទាក់ទង