រដ្ឋបាលខេត្តពោធិ៍សាត់

Pursat Administration
ស្វែងរក

ស្បៀងសង្គ្រោះបន្ទាន់ របស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ត្រូវបានបន្តចែកជូនប្រជាពលរដ្ឋ ដែលរងគ្រោះដោយសារជំនន់ទឹកភ្លៀងរដូវប្រាំង ចំនួន៨៩គ្រួសារ ក្នុងក្រុងពោធិ៍សាត់

  • 149
  • ដោយ Admin

(ពោធិ៍សាត់)៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត នាព្រឹកថ្ងៃទី២៧ ខែមករា ឆ្នាំ២០២៣នេះ នៅបរិវេណសាលាក្រុងពោធិ៍សាត់ បាននាំយក​អំណោយជាស្បៀងសង្គ្រោះបន្ទាប់ របស់រាជរដ្ឋាភិបាលកម្ពុជា តាមរយៈគណៈកម្មាធិការប្រព័ន្ធស្បៀងបម្រុងកម្ពុជា ទៅចែកជូនដល់ប្រជាពលរដ្ឋ ដែលរងគ្រោះដោយសារជំនន់ទឹកភ្លៀងរដូវប្រាំង ចំនួន៨៩គ្រួសារ មកពីសង្កាត់រលាប សង្កាត់ចំរើនផល និងសង្កាត់លលកស ក្រុងពោធិ៍សាត់ ខេត្តពោធិ៍សាត់។

នាឱកាសនោះ ឯកឧត្តម ខូយ រីដា បានពាំនាំនូវការផ្ដាំផ្ញើ សាកសួរសុខទុក្ខ ពីសំណាក់សម្តេចតេជោហ៊ុនសែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិតប៊ុនរ៉ានីហ៊ុនសែនប្រធានកាកបាទក្រហមកម្ពុជា ដែលសម្ដេចទាំងទ្វេ តែងតែនឹករឭក និងគិតគូរយកចិត្តទុកដាក់ ពីសុខទុក្ខរបស់ប្រជាពលរដ្ឋគ្រប់កាលៈទេសៈ «ទីណាមានពលរដ្ឋជួបទុក្ខ ទីនោះ​មាន​មុខសម្ដេចតេជោ និងសម្ដេចកិត្តិព្រឹទ្ធបណ្ឌិត»។

ឯកឧត្តមបានបញ្ជាក់ថា រាជរដ្ឋាភិបាល ក្រោមការដឹកនាំរបស់សម្ដេចតេជោ ដែលមានឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងារ​រាជរដ្ឋាភិបាល​ចុះមូលដ្ឋានខេត្ត និងមានឯកឧត្តម កែវ រតនៈ រដ្ឋមន្ត្រីប្រតិភូរាជរដ្ឋាភិបាល អគ្គនាយកអគ្គិសនីកម្ពុជា និងប្រធានក្រុមការងាររាជរដ្ឋាភិបាលចុះមូលដ្ឋានស្រុកក្រគរ និងស្រុកកណ្តៀង ព្រមទាំងក្រុមការងារ និងអាជ្ញាធរដែនដីគ្រប់ជាន់ថ្នាក់ ក្នុងកំឡុងពេលដែលបងប្អូនកំពុងតែ​ជួបការលំបាកនា​ពេលនេះ ថ្នាក់ដឹកនាំទាំងអស់ នៅតែត្រៀមចាំអន្តរាគមន៍ជួយប្រជាពលរដ្ឋ គ្រប់ពេលវេលាជានិច្ច។

ឯកឧត្តមអភិបាលខេត្ត បានក្រើនរំឭកបន្ថែម ដល់បងប្អូនប្រជាពលរដ្ឋ ត្រូវចូលរួមថែរក្សាសុខភាពឱ្យបានល្អ តាមរយៈការ​ហូបស្អាត ផឹកស្អាត រស់នៅស្អាត និងប្រកបដោយអនាម័យខ្ពស់។ ម្យ៉ាងទៀតត្រូវចូលរួមគាំទ្រគោលនយោបាយ របស់រាជរដ្ឋាភិបាល ដែលនាំមកនូវសុខសន្តិសន្តិភាព និងការអភិវឌ្ឍន៍ឥតឈប់ឈរ។

ឆ្លៀតក្នុងឱកាសនោះ ឯកឧត្តមក៏បានប្រកាសផ្តល់លេខទូរស័ព្ទ ចំនួន៣ប្រព័ន្ធ ជូនប្រជាពលរដ្ឋបានទទួលជ្រាប ងាយស្រួលក្នុងការដោះស្រាយ សម្របសម្រួល និងអន្តរាគមន៍បានទាន់ពេលវេលា ក្នុងករណីតម្រូវការចាំបាច់ណាមួយ ដែលកើតមានក្នុងមូលដ្ឋាន។

គួរបញ្ជាក់ថា អំណោយជាស្បៀងសង្គ្រោះបន្ទាន់ ដែលត្រូវចែកជូនប្រជាពលរដ្ឋ ដែលរងគ្រោះដោយសារជំនន់ទឹកភ្លៀងរដូវប្រាំង ទាំង៨៩គ្រួសារ ដោយក្នុងមួយគ្រួសារៗទទួលបានអង្ករ ២៥គីឡូក្រាម, មី១កេស, ត្រីខ១យួរ, ទឹកត្រី១យួរ, ទឹកស៊ីអ៊ីវ១យួរ និងទឹកបរិសុទ្ធ១កេស៕

Ti Amo (ពស)

អត្ថបទទាក់ទង