រដ្ឋបាលខេត្តពោធិ៍សាត់

Pursat Administration
ស្វែងរក

ប្រកាសទទួលស្គាល់ ឯកឧត្តម ខូយ រីដា ជាប្រធានកិត្តិយស គណៈកម្មាធិការសមាគមអតីតយុទ្ធជនកម្ពុជា ខេត្តពោធិ៍សាត់

  • 133
  • ដោយ Admin

(ពោធិ៍សាត់)៖ ឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាមានតួនាទីជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ និងជាអនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា នាថ្ងៃទី០៦ ខែមករា ឆ្នាំ២០២២នេះ បានអញ្ជើញជាអធិបតី ក្នុងពិធីប្រកាសទទួលស្គាល់ ឯកឧត្តម ខូយ រីដា ជាប្រធានកិត្តិយស គណៈកម្មាធិការសមាគមអតីតយុទ្ធជនកម្ពុជា ខេត្តពោធិ៍សាត់ 

ពិធីនេះត្រូវបានធ្វើឡើងនៅសាលប្រជុំសាលាខេត្ត ដោយបានការចូលរួមពីតំណាងអយ្យការអមសាលាដំបូងខេត្ត ថ្នាក់ដឹកនាំមន្ទីរអង្គភាពនានាជុំវិញខេត្ត មេបញ្ជាការកងកម្លាំងប្រដាប់អាវុធទាំង៣ អភិបាលក្រុងស្រុក មេឃុំចៅសង្កាត់ និងមន្ត្រីពាក់ព័ន្ធមួយចំនួនទៀត។

យោងតាមសេចក្ដីសម្រេចលេខ១០៥.២០២២.សអក របស់សមាគមអតីតយុទ្ធជនកម្ពុជា ចុះថ្ងៃទី២៣ ខែធ្នូ ឆ្នាំ២០២២ ត្រូវបានទទួលស្គាល់ឯកឧត្តម ខូយ រីដា ជាប្រធានកិត្តិយស គណៈកម្មាធិការសមាគមអតីតយុទ្ធជនកម្ពុជាខេត្តពោធិ៍សាត់។ 

បន្ទាប់ពីពិធីប្រគល់ទទួលសេចក្ដីសម្រេច និងបំពាក់ឡូហ្គូសមាគមអតីតយុទ្ធជនរួចមក ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ និងជាប្រធានកិត្តិយស គណៈកម្មាធិការសមាគមអតីតយុទ្ធជនកម្ពុជាខេត្ត បានប្ដេជ្ញាថានឹងខិតខំអនុវត្តតាមគោលការណ៍ និងការណែនាំដ៏ខ្ពង់ខ្ពស់ របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ព្រមទាំងយកចិត្តទុកដាក់ គោរព ដឹងគុណ ចំពោះគុណបំណាច់ដ៏ធំធេង របស់អតីតយុទ្ធជនគ្រប់រូប ដែលបានលះបង់សាច់ស្រស់ឈាមស្រស់ ដើម្បីរំដោះជាតិមាតុភូមិពីភ្លើងសង្គ្រាម។ យកចិត្តទុកដាក់បញ្ហាសុខទុក្ខ និងជីវភាពរស់នៅរបស់អតីតយុទ្ធជនគ្រប់រូប។ បង្កើនវប្បធម៌ចែករំលែកដល់អតីតយុទ្ធជន និងគ្រួសារពលី ដែលមានជីវភាពខ្វះខាតនៅតាមមូលដ្ឋាន។ គាំទ្រ និងបន្តជម្រុញដល់ចលនាសមាគមអតីតយុទ្ធជន មានដំណើរការល្អ ដើម្បីលើកកម្ពស់តួនាទីរបស់អតីតយុទ្ធជន ឱ្យស័ក្កិសមនឹងគុណបំណាច់ ក្នុងបុព្វហេតុជាតិ និងប្រជាជន។ ផ្ដល់អាទិភាពជូនអតីតយុទ្ធជន ក្នុងការចូលរួមគ្រប់ទម្រង់សកម្មភាពក្នុងសង្គម។ 

ជាមួយគ្នានោះ ឯកឧត្តមទេសរដ្ឋមន្ត្រី គន់ គីម បាននាំមកនូវការនឹករលឹកពីសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះបងប្អូនអតីតយុទ្ធជន និងថ្នាក់ដឹកនាំខេត្តពោធិ៍សាត់ ជានិច្ចកាលសម្ដេចតែងតែគិតគូរ និងយកចិត្តទុកដាក់គ្រប់ពេលវេលា។ ឯកឧត្តមសុំឱ្យអាជ្ញាធរមូលដ្ឋាន ពិនិត្យគ្រួសារអតីតយុទ្ធជនដែលទីទល់ក្រ ចំនួន១០៩គ្រួសារ និងក្រប្រមាណ២ពាន់គ្រួសារ ក្នុងខេត្តពោធិ៍សាត់នេះ បានទទួលប័ណ្ណក្រីក្រ និងបានទទួលនូវប្រាក់គោលនយោបាយ របស់រាជរដ្ឋាភិបាល ដែលបានជួយទៅលើការប៉ះពាល់គ្រោះមហន្តរាយ។ ឯកឧត្តមសូមស្នើដល់ប្រធានកិត្តិយស គណៈកម្មាធិកាសមាគមអតីតយុទ្ធជនកម្ពុជា ខេត្តពោធិ៍សាត់ថ្មី បន្តពង្រឹងការអនុវត្តឱ្យបានម៉ឺងម៉ាត់ នូវអនុសាសន៍ដ៏ខ្ពង់ខ្ពស់ ទាំង១៤ចំណុច របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានសមាគមអតីតយុទ្ធជនកម្ពុជា ក្នុងឱកាសពិធីបិទមហាសន្និបាត សមាគមអតីតយុទ្ធជនកម្ពុជាទូទាំងប្រទេសលើកទី២ កាលពីថ្ងៃទី០២ ខែកញ្ញា ឆ្នាំ២០១៥កន្លងទៅ ឱ្យទទួលបានលទ្ធផលប្រកបដោយប្រសិទ្ធភាពខ្ពស់៕

Ti Amo (ពស)

អត្ថបទទាក់ទង