រដ្ឋបាលខេត្តពោធិ៍សាត់

Pursat Administration
ស្វែងរក

អភិបាលខេត្តពោធិ៍សាត់ ជម្រុញដល់គ្រប់ស្ថាប័នអង្គភាពពាក់ព័ន្ធ ត្រូវបំពេញតួនាទីភារកិច្ចឱ្យបានម៉ឺងម៉ាត់ និងត្រូវពន្លឿនរៀបចំរបាយការណ៍ ជូនគណៈកម្មាធិការជាតិ ទប់ស្កាត់ និងបង្ក្រាបបទល្មើសធនធានធម្មជាតិ

  • 172
  • ដោយ Admin


(ពោធិ៍សាត់)៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ នាថ្ងៃទី២៣ ខែធ្នូ ឆ្នាំ២០២២នេះ បានជម្រុញឱ្យគ្រប់ស្ថាប័នមន្ទីរអង្គភាព និងអាជ្ញាធរពាក់ព័ន្ធទាំងអស់ ត្រូវយកចិត្តទុកដាក់បំពេញតួនាទីភារកិច្ច ក្នុងដែនគ្រប់គ្រងរបស់ខ្លួនឱ្យបានម៉ឺងម៉ាត់ សំដៅទប់ស្កាត់ និងបង្ក្រាបបទល្មើសធនធានធម្មជាតិ ឱ្យមានប្រសិទ្ធភាពខ្ពស់ ស្របតាមច្បាប់កំណត់ និងត្រូវពន្លឿនរៀបចំរបាយការណ៍ ជូនគណៈកម្មាធិការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ឱ្យបានឆាប់។

ឯកឧត្តមអភិបាលខេត្ត បានជម្រុញបែបនេះ ក្នុងឱកាសដឹកនាំកិច្ចប្រជុំបន្ទាន់មួយ ទាក់ទងនឹងការរៀបចំរបាយការណ៍ ជូនគណៈកម្មាធិការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដែលត្រូវធ្វើឡើងនៅសាលប្រជុំជាន់ទី១ សាលាខេត្ត។

ក្នុងកិច្ចប្រជុំនេះ ឯកឧត្តមអភិបាលខេត្ត បានលើកឡើងថា យើងទាំងអស់គ្នា មិនត្រូវគិតត្រឹមតែមួយជ្រុងនោះទេ ពោលគឺត្រូវគិតឱ្យបានគ្រប់វិស័យ។ ប្រតិបត្តិការមិនចាំបាច់ឆ្លងយោបល់ច្រើននាំឱ្យស្មុគស្មាញឡើយ ព្រោះថាអ្វីៗ ក៏ដូចជាតួនាទីភារកិច្ច គឺបានប្រគល់ជូនដល់អស់លោកឱ្យអស់ហើយ ក្នុងការរៀបចំផែនការធ្វើសកម្មភាព ការចុះទប់ស្កាត់ និងបង្ក្រាបបទល្មើស។ ដោយឡែកការចុះឈ្វៀលដីជារបស់រដ្ឋ ត្រូវបែងចែកយ៉ាងណានោះ គឺពិនិត្យលើស្ថានភាពទីតាំងភូមិសាស្ត្រ និងការរៀបចំតំបន់ប្រតិបត្តិការ ជាមួយនឹងដីអាស្រ័យផល ដីបម្រុងទុក្ខរបស់រដ្ឋ។

ឯកឧត្តមអភិបាលខេត្ត បានបញ្ជាក់ថា ក្រៅពីការផ្ទេរកម្មសិទ្ធិដីធ្លីតាមផ្លូវច្បាប់ ប្លង់រឹងជូនប្រជាពលរដ្ឋ គឺត្រូវហាមដាច់ខាត មេភូមិ មេឃុំ បញ្ជាក់លើលិខិតស្នាមទិញលក់ដី អភិបាលក្រុងស្រុកត្រូវធ្វើកិច្ចការនោះកុំទុកយូរ។ ដោយឡែកចំពោះការផ្ដល់សេវាលើកម្មសិទ្ធិដីធ្លីស្របច្បាប់ មានប្លង់រឹងត្រឹមត្រូវ ដែលមិនមែនជាដីអាស្រ័យផល ចាប់យករបៀបអាណាធិបតេយ្យ ត្រូវតែរៀបចំធ្វើជូនឱ្យបានឆាប់រហ័ស ជៀសវាងយឺតយ៉ាវធ្វើឱ្យមានការឆ្នាំថ្នាក់ ពីបងប្អូនប្រជាពលរដ្ឋ។

ឆ្លៀតក្នុងឱកាសនោះ ឯកឧត្តមអភិបាលខេត្ត ក៏បានបន្តផ្ទេរសិទ្ធិដល់ លោក ចេង ឡៃ អភិបាលរងនៃគណៈអភិបាលខេត្ត ដើម្បីដឹកនាំកិច្ចប្រជុំនេះបន្ត ធ្វើយ៉ាងណាត្រៀមលក្ខណៈរៀបចំរបាយការណ៍ ជូនគណៈកម្មាធិការជាតិ ឱ្យបានឆាប់រហ័ស៕

Ti Amo (ពស)

អត្ថបទទាក់ទង