រដ្ឋបាលខេត្តពោធិ៍សាត់

Pursat Administration
ស្វែងរក

អភិបាលខេត្តពោធិ៍សាត់ ប្រកាសនឹងខិតខំធ្វើយ៉ាងណាឱ្យខេត្តពោធិ៍សាត់ប្រែមុខប្រែមាត់ ហើយមិនទុកឱ្យជនល្មើសឡើងគីឡូនោះដែរ

  • 45
  • ដោយ Admin

(ពោធិ៍សាត់)៖ បន្ទាប់ពីប្រកាសចូលកាន់មុខតំណែង អភិបាលនៃគណៈអភិបាលខេត្ត នាពេលកន្លងមកនេះ, ឯកឧត្តម​ ខូយ រីដា អភិបាលនៃគណៈអភិបាលខេត្តពោធិ៍សាត់ និងជាប្រធានគណៈបញ្ជាការឯកភាពខេត្ត បានប្រកាសពីយន្តការដឹកនាំរដ្ឋបាលខេត្ត លោកនឹងបន្តខិតខំប្រឹងប្រែង សំដៅធ្វើយ៉ាងណាឱ្យខេត្តពោធិ៍សាត់ប្រែមុខ​ប្រែមាត់ជាបណ្តើរៗ ហើយក៏មិនទុកឱ្យជនល្មើស ឡើងគីឡូនោះដែរ។ ជនល្មើសត្រូវត្រៀមខ្លួនឱ្យហើយ ជាពិសេសសកម្មជនដីធ្លី នៅស្រុកវាលវែង ស្រុកភ្នំក្រវាញ ត្រូវតែបង្ក្រាបទប់ស្កាត់ និងអនុវត្តទៅតាមវិធានការច្បាប់ឱ្យបានម៉ឹងម៉ាត់ ដើម្បីថែរក្សាការពារធនធានធម្មជាតិទាំងនោះ ឱ្យនៅគង់វង្ស សម្រាប់មនុស្សជំនាន់ក្រោយៗ។

ឯកឧត្តម ខូយ រីដា មានប្រសាសន៍លើកឡើងបែបនេះ នៅសាលប្រជុំសាលាខេត្ត ក្នុងឱកាសដឹកនាំកិច្ចប្រជុំគណៈបញ្ជាការឯកភាពខេត្ត ប្រចាំខែវិច្ឆិកា និងលើកទិសដៅប្រចាំខែធ្នូ ឆ្នាំ២០២២ កាលពីថ្ងៃទី២៥ ខែវិច្ឆិកា ឆ្នាំ២០២២ម្សិលមិញ ដោយមានការចូលរួមពីលោក លោកស្រីអភិបាលរងខេត្ត តំណាងអយ្យការអមសាលាដំបូងខេត្ត នាយក នាយករងរដ្ឋបាលសាលាខេត្ត ប្រធាន អនុប្រធានមន្ទីរនានាជុំវិញខេត្ត កងកម្លាំងប្រដាប់អាវុធទាំង៣ និងអង្គភាពដែលមានការពាក់ព័ន្ធមួយចំនួនទៀត។

តាមរបៀបវារនៃកិច្ចប្រជុំនេះ មានសេចក្តីរាយការណ៍ ពីលោកឧត្តមសេនីយ៍ត្រី ហៀង ស៊ីថា ស្នងការរងនគរបាលខេត្ត ពាក់ព័ន្ធនឹងការអនុវត្តច្បាប់ចរាចរណ៍ផ្លូវគោក​ បញ្ហាគ្រឿងញៀន ការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព និងសភាពការណ៍សន្តិសុខតាមបន្ទាត់ព្រំដែន កម្ពុជា-ថៃ។ ក្នុងនោះដែរក៏មានការលើកឡើងពីលោកអភិបាលស្រុក និងលោកអភិបាលរងខេត្ត ពាក់ព័ន្ធទៅនឹងការងារបង្កបង្កើនផល ការប្រមូលផលស្រូវ និងបញ្ហាសំណង់រឹង ដែលសាងសង់យ៉ាងអណាធិបតេយ្យ ជាហេតុធ្វើឱ្យបាត់សណ្តាប់ធ្នាប់ និងសោភណ្ឌភាពនៅក្នុងទីប្រជុំជន ក្រុង-ស្រុក។

ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ និងជាប្រធានគណៈបញ្ជាការឯកភាពខេត្ត ​បានថ្លែងថា រយៈពេល៨ឆ្នាំ ជាអភិបាលរងខេត្តពោធិ៍សាត់ ៨ខែ ជាអភិបាលរងខេត្តបាត់ដំបង បច្ចុប្បន្នជាអភិបាលនៃគណៈអភិបាលខេត្តពោធិ៍សាត់ ជាខេត្តស្រុកកំណើត។ ដើម្បីឱ្យស្របទៅតាមយន្តការដឹកនាំ និងបម្រើប្រជាពលរដ្ឋនោះ ឯកឧត្តមបន្តការខិតខំប្រឹងប្រែង ដោយសហការជាមួយគ្រប់ភាគីពាក់ព័ន្ធ ធ្វើការអភិវឌ្ឍន៍ខេត្តពោធិ៍សាត់ ឱ្យកាន់តែប្រែមុខ​ប្រែមាត់ជាបណ្តើរៗ ហើយក្នុងនោះក៏មិនទុកឱ្យជនល្មើសប្រែមុខមាត់ឬឡើងគីឡូនោះដែរ។ ជនល្មើសត្រូវតែត្រៀមខ្លួនឱ្យហើយទៅ ជាពិសេសសកម្មជនដីធ្លី នៅស្រុកវាលវែង ស្រុកភ្នំក្រវាញ។  រដ្ឋបាលខេត្តត្រូវប្រើប្រាស់កម្លាំងសរុប វិធានការសរុប និងមធ្យោបាយសរុប ទៅតាមផ្លូវច្បាប់ ក្នុងការបង្ការបង្ក្រាបទប់ស្កាត់ នូវរាល់បទល្មើសគ្រប់ប្រភេទ សំដៅថែរក្សាការពារសន្តិសុខ សណ្តាប់ធ្នាប់ និងធនធានធម្មជាតិឱ្យបានគង់វង្ស សម្រាប់មនុស្សជំនាន់ក្រោយៗ។

ឯកឧត្តមបានលើកឡើងទៀតថា គោលដៅចម្បង និងមានសារៈសំខាន់ចំពោះមុខនោះ ក្នុងនាមរដ្ឋបាលខេត្ត កែលំអរសោភណ្ឌភាពនៅក្នុងទីប្រជុំជនក្រុង ដែលជាបេះដូងខេត្ត ដូចជារៀបចំដាក់ឧបករណ៍ ហាត់ប្រាណនៅលើកោះសំពៅមាស សួនច្បារ ដាក់ភ្លើងបំភ្លឺនៅតាមដងផ្លូវ និងទីសាធារណៈបានស្អាតល្អ។ គ្រប់មន្ទីរ អង្គភាព លំនៅដ្ឋាន និងតាមដងផ្លូវមិនឱ្យមានសំរាម បើមានត្រូវវិចខ្ចប់ និងដឹកជញ្ជូនឱ្យបានទាន់ពេលវេលា។ ចំពោះសំណង់អណាធិបតេយ្យនៅតាមដងស្ទឹង សូមឱ្យរដ្ឋបាលស្រុក ក្រុង ជាអ្នកអនុវត្ត។ នៅក្នុងខណៈនោះ ឯកឧត្តមក៏បានផ្តល់នូវអនុសាសន៍មួយចំនួន សម្រាប់យកទៅអនុវត្តនោះ គឺមិនឱ្យមានបទល្មើសដូចជាចោរកម្ម គ្រឿងញៀន ល្បែងស៊ីសង ក្មេងទំនើង បន្តអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព​ គោរពច្បាប់ចរាចរណ៍ ចូលរួមថែរក្សាហេដ្ឋារចនាស័ម្ពន្ធ និងសមិទ្ធិផលនានានៅក្នុងមូលដ្ឋាន ពង្រឹងការផ្តល់អត្រានុកូលដ្ឋាន អត្តសញ្ញាណប័ណ្ណ ពិនិត្យ និងចុះឈ្មោះបោះឆ្នោត សម្របសម្រួលដោះស្រាយក្រៅប្រព័ន្ធតុលាការ ជម្រុញ ការចាក់វ៉ាក់សាំងបង្កាជំងឺកូវីដ១៩ជាដើម៕

Ti Amo (ពស) 

អត្ថបទទាក់ទង