រដ្ឋបាលខេត្តពោធិ៍សាត់

Pursat Administration
ស្វែងរក

ជនចាស់ជរា ស្ត្រីមានផ្ទៃពោះ និងគ្រួសារក្រីក្រ ជិត២០០គ្រួសារ រស់នៅលើផ្ទៃទឹកបឹងទន្លេសាប ក្នុងឃុំរាំងទិល ទទួលអំណោយពីរដ្ឋបាលខេត្តពោធិ៍សាត់ និងសាខាសមាគមនារីខេត្ត (Video inside)

  • 1.4ពាន់
  • ដោយ Admin
https://youtu.be/zueTQgr4nDI

(ពោធិ៍សាត់)៖ ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ និងលោកជំទាវ ហ៊ុន ចាន់ធី ប្រធានកិត្តិយស សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្ត នាថ្ងៃទី២២ ខែវិច្ឆិកា ឆ្នាំ២០២០នេះ បាននាំយកអំណោយ ផ្ដល់ជូនជនចាស់ជរា ស្ត្រីមានផ្ទៃពោះ និងគ្រួសារក្រីក្រ ចំនួន១៦៤គ្រួសារ រស់នៅលើផ្ទៃទឹកបឹងទន្លេសាប ក្នុងឃុំរាំងទិល ស្រុកកណ្ដៀង ខេត្តពោធិ៍សាត់ ដែលពិបាកក្នុងការចេញទៅរកស៊ីទទួលទាន នារដូវវស្សាកន្លងមក។

ថ្លែងក្នុងឱកាសនោះ ឯកឧត្តម ម៉ៅ ធនិន បានពាំនាំការផ្តាំផ្ញើសាកសួរសុខទុក្ខ ក្ដីនឹករលឹក និងការគិតគូរពីជីវភាពរស់នៅរបស់ប្រជាពលរដ្ឋ ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចទាំងទ្វេរតែងតែលើកទឹកចិត្ត ដល់ប្រជាពលរដ្ឋទាំងអស់ ឱ្យខិតខំស្តារជីវភាពគ្រួសារឡើងវិញ បន្ទាប់ពីរងផលប៉ះពាល់ដល់ការរកស៊ីទទួលទាន នារដូវវស្សាកន្លងមក។ ជាការពិតណាស់ថា ក្រុមការងារចុះជួយស្រុកក្រគរ និងស្រុកកណ្តៀង ដែលដឹកនាំដោយ ឯកឧត្តម កែវ រតនៈ ជាប្រធាន លោកតែងរមែងគិតគូរ និងយកចិត្តទុកដាក់ខ្ពស់ ចំពោះសុខទុក្ខពុកម៉ែប្រជាពលរដ្ឋរបស់យើង ជាក់ស្តែងប្រជាពលរដ្ឋនៅក្នុងឃុំរាំងទិល នេះផ្ទាល់តែម្តង។

ឯកឧត្តមបាន​ណែនាំ​ដល់ប្រជានេសាទទាំងអស់ ត្រូវ​បញ្ឈប់​សកម្មភាព​ប្រើប្រាស់​ឧ​បក​ណ៍​ល្មើសច្បាប់នានា និង​មានវិធានការការពារ ​ថែរក្សា​មច្ឆជាតិ​ទាំងអស់​គ្នា ដើម្បីកំណើនត្រីកើនឡើង សម្រាប់ទៅថ្ងៃអនាគត។ ឯកឧត្តមបានលើកទឹកចិត្តដល់ពុកម៉ែប្រជាពលរដ្ឋ ត្រូវចូលរួមសហការបង្ក្រាបរាល់បទល្មើសគ្រប់ប្រភេទ ជាពិសេសបទល្មើសជលផល ដោយប្រើប្រាស់កម្លាំងសរុប មធ្យោបាយសរុប និងព័ត៌មានសរុប ដើម្បីភាពសុខសាន្តរបស់យើងទាំងអស់គ្នា។

ជាមួយគ្នានោះ ឯកឧត្តមបានអំពាវនាវដល់ប្រជាពលរដ្ឋទាំងអស់ សូមបន្តអនុវត្តវិធានការនានា របស់ក្រសួងសុខាភិបាល ដើម្បីទប់ស្កាត់ការរីករាលដាលជំងឺកូវីដ១៩ និងត្រូវយកចិត្តទុកដាក់គិតគូរថែទាំសុខភាព ឱ្យបានល្អប្រសើរ ត្រូវរស់នៅមានអនាម័យ និងពិសាទឹកដាំឆ្អិន ដើម្បីជៀសផុតពីជំងឺដង្កាត់ផ្សេងៗ។

នាឱកាសនោះ ឯកឧត្តម ម៉ៅ ធនិន និងលោកជំទាវ ហ៊ុន ចាន់ធី ព្រមទាំងប្រតិភូ ក៏បានចែកអំណោយផ្ទាល់ដៃ ជូនដល់ជនចាស់ជរា ស្ត្រីមានផ្ទៃពោះ និងគ្រួសារក្រីក្រ ចំនួន១៦៤គ្រួសារ ដោយក្នុងមួយគ្រួសារៗទទួលបាន៖ មី១កេសតូច ទឹកស៊ីអ៊ីវ៦ដប ខោអាវមួយកំផ្លេ ថ្នាំពេទ្យ១កញ្ចប់ ភួយ១ និងសារុង១ផងដែរ៕

Ti Amo (ពស)

អត្ថបទទាក់ទង