រដ្ឋបាលខេត្តពោធិ៍សាត់
Pursat Administrationគ្រឿងឧបភោគបរិភោគរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ត្រូវចែកជូនប្រជាពលរដ្ឋ១០០គ្រួសារ រងគ្រោះដោយជំនន់ទឹកភ្លៀង នៅខេត្តពោធិ៍សាត់
(ពោធិ៍សាត់)៖ ឯកឧត្ដម ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន និងឯកឧត្ដម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ នាព្រឹកថ្ងៃទី១៦ ខែតុលា ឆ្នាំ២០២០ បានចុះចែកគ្រឿងឧបភោគបរិភោគ និងថវិកាមួយចំនួន ជូនដល់ប្រជាពលរដ្ឋរងគ្រោះដោយជំនន់ទឹកភ្លៀង ដែលកំពុងត្រូវការស្បៀងជាចាំបាច់ ចំនួន១០០ គ្រួសារ នៅបរិវេណសាលាឆាន់វត្តស្បូវរីក ស្ថិតក្នុងឃុំលាច ស្រុកភ្នំក្រវាញ ខេត្តពោធិ៍សាត់។ គ្រឿងឧបភោគបរិភោគនាថ្ងៃនេះ មានការចូលរួមចំណែកពីសមាគមជួយសង្គ្រោះប្រជាជននៅកម្ពុជា ផងដែរ។
ឯកឧត្ដម ទេសរដ្ឋមន្ត្រី លី ធុជ បានពាំនាំនូវសេចក្ដីសួរសុខទុក្ខ ការអាណិតអាសូរ និងការសោកស្ដាយរបស់សម្តេចតេជោ និងសម្តេចកិត្តិព្រឹទ្ធបណ្ឌិត ជូនចំពោះបងប្អូនប្រជាពលរដ្ឋក្នុងខេត្តពោធិ៍សាត់ទាំងមូល ក៏ដូចជាប្រជាពលរដ្ឋក្នុងស្រុកភ្នំក្រវាញ ហេីយដែលសម្តេចទាំងទ្វេ រមិនដែលបោះបង់បងប្អូនជនរួមជាតិណាម្នាក់ឡើយ។
ឆ្លៀតឱកាសមុននឹងចែកអំណោយខាងលើ ឯកឧត្ដម ទេសរដ្ឋមន្ត្រី លី ធុជ និងឯកឧត្ដម ម៉ៅ ធនិន ក៏បានចូលរួមចែកអំណោយជាមួយកាកបាទក្រហមកម្ពុជា ដឹកនាំដោយ ឯកឧត្តម អ៊ុយ សំអាត ប្រធាននាយកដ្ឋានគ្រប់គ្រងគ្រោះមហន្តរាយ នៃកាកបាទក្រហមកម្ពុជា តំណាងដ៏ខ្ពង់ខ្ពស់របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនបងប្អូនពុកម៉ែប្រជាពលរដ្ឋ ចំនួន៥០គ្រួសារ ដែលរងផលប៉ះពាល់ដោយជំនន់ទឹកភ្លៀង នៅឃុំបាក់ចិញ្ចៀន ស្រុកភ្នំក្រវាញ ខេត្តពោធិ៍សាត់។
សូមបញ្ជាក់ថា បន្ទាប់ពីទទួលរងឥទ្ធិពលព្យុះ និងភ្លៀងធ្លាក់ជាបន្តបន្ទាប់ រយៈពេលជាច្រើនថ្ងៃមក ធ្វើឱ្យក្នុងភូមិសាស្ត្រក្នុងខេត្តពោធិ៍សាត់ បង្កឱ្យមានជំនន់ទឹកភ្លៀងតាមដងស្ទឹងពោធិ៍សាត់ និងរងប៉ះពាល់ ៦ក្រុង/ស្រុក ក្នុងនោះក្រុងពោធិ៍សាត់ និងស្រុកកណ្តៀង បានរងប៉ះពាល់ខ្លាំងជាងគេ បណ្តាលឱ្យលិចលង់ផ្លូវមួយចំនួន ប៉ះពាល់ដល់លំនៅដ្ឋាន ដំណាំស្រូវ ហេដ្ឋារចនាសម្ព័ន្ធមួយចំនួន និងបណ្តាលឱ្យបាត់បង់អាយុជីវិតមនុស្ស៣នាក់ផងដែរ៕
Ti Amo (ពស)
